ಮಂಜಿನ ಹನಿಯಲ್ಲಿ ಒಮ್ಮೆ ಮಿಂದು ಹೋದುವರು

Wednesday 18 June 2014

ಪಾಪಿಯಾಗಬೇಕಿದೆ!


ಪಾಪಿಯಾಗಬೇಕು ನಾನು,
ಮನಸ್ಸನ್ನು ಮುಗುಮ್ಮಾಗಿ ಆವರಿಸುವ
ಪೋಲಿ ಕನಸುಗಳಿಗೆ
ಸಮಜಾಯಿಷಿ ಹೇಳಿ ಸಾಕಾಗಿದೆ!
ಹುಟ್ಟಿದೊಂದು ಕಲ್ಪನೆಯೂ
ಕಾರಿರುಳ ರಾತ್ರಿಯಲಿ
ಕರಗಿ ಕಣ್ಣೀರಾಗಿದೆ...
ಎದೆಗೆ ದಿಗಿಲು ಹತ್ತಿಸುವ
ನೋವುಗಳನು ಕತ್ತರಿಸಿ
ಬಿಸುಟು ನಾ ಪಾಪಿಯಾಗಬೇಕಿದೆ!

ಏರು ಜವ್ವನದ ಬಿಸಿಗೆ
ಮಳೆಗಾಲಕ್ಕೆ ನೂರು ಬೈಗುಳ;
ನಿದ್ರೆಯಲ್ಲೂ ಎಡೆಬಿಡದೆ
ಕಾಡುವ ಆಸೆಯೊಂದರ
ಕಣ್ಣಿಗೆ ನಿನ್ನದೇ ಕಾಡಿಗೆ...
ಅದೇನು, ತೊಂಡೆ ಹಣ್ಣುಗಳೆ
ತುಟಿಯಾದವೇನು?
ನೀ ಹೊದ್ದ ಕೆಂಪು ಪರದೆ ಸರಿಸಿ,
ನಿನ್ನಂದದ ಇಂಚಿಂಚನ್ನೂ
ಕಣ್ಣಿನಲ್ಲೇ ಕುಡಿದು ನಶೆಯೇರಬೇಕು;
ಅಂದವೆಂಬ ಸುರೆಯೊಂದು ಸಾಕು!

ಕನಸಿನಲ್ಲೂ ಆ ತುಂಬಿದೆದೆಗಳ
ಆಯಸ್ಕಾಂತದಿಂದ ತಪ್ಪಿಸಿಕೊಳ್ಳಲಾಗುತ್ತಿಲ್ಲ,
ಮಡಿ-ಮೈಲಿಗೆಯ ಪೊರೆ ಕಳಚಿ
ನನ್ನನ್ನು ನಾ ಒಪ್ಪಿಸಿಕೊಳ್ಳಲಾಗುತ್ತಿಲ್ಲ,
ಪ್ರೇಮವೆಂದರೆ ಮೈ, ಮನಸು,
ಕಣ್ಣು, ಕನಸು, ಆತ್ಮದಣುವಣುವೂ
ಬೆರೆತು ಬೆವರಬೇಕಂತೆ,
ಸಂಭೋಗಕ್ಕೆ ತೊಡಗಿ ಹರಿಯಬೇಕಂತೆ;
ಉಳಿದೆಲ್ಲವೂ ಬೆರೆತಂತಾಗಿದೆ,
ಮೈಯೊಂದನು ಕಲಸಿ, ಬೆವರು ನೆನೆಸಬೇಕು...
ಕನಸಲ್ಲಾದರೂ ಒಮ್ಮೆ ಬೆತ್ತಲಾಗು,
ನಾನು ಪಾಪಿಯಾಗಬೇಕಿದೆ,
ಅಟ್ಲೀಸ್ಟು ಪ್ರೇಮಿಯಾಗಬೇಕಿದೆ!

--> ಮಂಜಿನ ಹನಿ

ಚಿತ್ರ ಕೃಪೆ: ಗೂಗಲ್ ಅಂತರ್ಜಾಲ

Saturday 7 June 2014

ಕ್ಷಮಿಸು, ಏನೂ ಗೊತ್ತಿಲ್ಲದಂತಿದ್ದೇನೆ!


ನನಗೆ ಗೊತ್ತಿದೆ,
ನಿನ್ನ ಮುಂದೆ ಬಾಗಿ ನಮಿಸಿ
ಕಣ್ಣೀರ್ಗರೆದರೂ ತೊಳೆಯಲಾರದ
ಪಾಪ ಹೊತ್ತುಕೊಂಡಿದ್ದೇವೆಂದು!
ಸೆರಗೆಳೆದು, ಹರಿದು ತಿನ್ನಲು ಬಂದ
ಕಿರುಬಗಳನ್ನೆಷ್ಟು ಸಲ
ಸಹಿಸಿದ್ದೀಯೋ, ಕ್ಷಮಿಸಿದ್ದೀಯೋ...
ನೆನಸಿಕೊಂಡಾಗೆಲ್ಲ ನಿರ್ವೀರ್ಯನಾಗುತ್ತೇನೆ,
ನಿರುತ್ತರನಾಗುತ್ತೇನೆ,
ಮಾತಾಗದ ದಾರಿ ಹುಡುಕುತ್ತೇನೆ;
ಸಹಿಸಲಾಗದೆ ತಣ್ಣಗೆ ಉರಿಯುತ್ತೇನೆ!

ನನಗೆ ಗೊತ್ತಿದೆ,
ತಾನೇ ಉರಿದು ಬೆಳಕಾಗುವ ದೀಪದ
ಬತ್ತಿ ಚಿವುಟಿ, ಮೇಲೆತ್ತದೆ,
ಎಣ್ಣೆ ನೆನೆಸದೆ ಕತ್ತಲಾಗಿಸುತ್ತಿದ್ದೇವೆಂದು;
ಮೈಯ ತೆವಲು ತಣಿಸಿಕೊಳುವ
ಆಸೆಗೆ, ನಾಲಿಗೆ ಚಾಚಿ
ಪ್ರೀತಿ, ಅಂತಃಕರಣ,
ಮನುಷ್ಯತ್ವಗಳಿಗೆ ಎಳ್ಳುನೀರು
ಬಿಟ್ಟು ರಕ್ಷಿಸುವ ಸೋಗು ಹಾಕಿ
ಸುಮ್ಮನೆ ಕೂತಿದ್ದೇವೆಂದು!
ನಿನ್ನದೆ ಉಸಿರು ಪಡೆದು,
ನಿನ್ನ ಉಸಿರುಗಟ್ಟಿಸುತ್ತಿದ್ದೇವೆಂದು!

ನನಗೆ ಗೊತ್ತಿದೆ,
ಸಹನೆಯೂ, ಶೀಲೆಯೂ ಆದ ನೀನು,
ಅಂಬೆಯೂ, ಚಂಡಿಯೂ ಎಂದು;
ಮಡದಿಯೂ, ಮಗಳೂ ಆದ ನೀನು,
ಸಿಡಿಲೂ, ಗುಡುಗೂ ಎಂದು;
ಗೆಳತಿಯೂ, ಸೆಳೆತವೂ ಆದ ನೀನು,
ನೆರೆ ಹತ್ತಿ ಧರೆ ನಿರ್ನಾಮ
ಮಾಡಿಬಿಡಬಹುದಾದ ನದಿಯೂ ಎಂದು!
ಎಲ್ಲವನ್ನೂ, ಏನನ್ನೂ
ಸರಿಪಡಿಸಲಾಗದ ಅಸಹಾಯಕತೆಗೆ,
ಏನೂ ಗೊತ್ತಿಲ್ಲದವನಂತಿದ್ದೇನೆ,
ಕ್ಷಮಿಸು, ಏನೂ ಗೊತ್ತಿಲ್ಲದಂತಿದ್ದೇನೆ!

--> ಮಂಜಿನ ಹನಿ

ಚಿತ್ರಕೃಪೆ: ಗೂಗಲ್ ಅಂತರ್ಜಾಲ